es gebi Lüht

wo nid vo ire lohschömid

si wärdi sitt Jahre

verfolgt und beläschtiget

si chöni drum

niä nur a eim Ohrt wone

si woni immer mindeschtens

a drey Ohrte

dahs chöni är verschtah

hebi är gseit

är chöni guet verschtah

das eine vo ire nid chönn lohschoh

är sälber segi ja au

nu mitt de gröschte Schwirigkeite

vo ire lohschoh

är hebi dahs gschafft

aber es erschtuhni inn nid

dases anderi nid schaffid

und er frägi sich mängmal

öb de Priis wonär zallt hebi

nid z grohs gsi segi

si segid feschti Männsche gsi

si hebid warrschinnli

zu de feschtischteschte Männsche ghört

wos jeh ggäh hebi d Mänsche

segid nid zu allne Ziite glich fescht

hütt zum Bischspihl segids nüme fescht

sondern im Gägeteil bireweich

si zerflühssid richtiggehend

hütt flatteri ales und zucki

räni chopflohs hin und her

es segi we imene Hüenerhoof

oder imene Akwariumm

än richtige Mänsch aber

mös wenen Felse fescht schtah

aber dahs mösi mer leehre

dahs hebi mer zu gwüsse Ziite glehrt

und lehre möse wärs nid glehrt hebi

däh segi soffort underggange

hütt chöni mer durchuhs labil sih

oni dass öppis passieri

hütt bruchis kei Feschtigkeit me

im Gägeteil Feschti tögid nur schtöhre

und unahgnehm uuffalle

Lüht we sini Elltere chönis hütt

nüme gäh dahs segi schahd

dahs tunki inn fascht echli e Kattaschtohfe

wär meini er segi schtändig am chlage

wär meini er gebi immer ales verlore

und gsechi niänätme en Sinn

däh gsechi dahs nid richtig

däh mösi nuremal richtig zuelose

und zueluege wänär schpilli

wännar schpili dänn chömi doch

i jedem Tohn en unngghüüri Läbesfreud

zum Usdruck dänn chündi doch jede Tohn a

das dah eine nid ufgeb niemals ufgeb

sondern im Gägeteil sini Schtimm erhebi

bis i ali Himmel ue und wänns töhni

wiä e Chlahg dänn seli mer sich nid la tühsche

es segi en Triumpf es segi Höchschts

und Gröschts es segi e Fiihr nüt als

e grossi Fiihr wo über e paar tuusig

Konzärtt göng und diä grossi Fiihr segi dah

es chöni si niämärt me wägnäh di ganz äärde

bränni und tanzzi und jubli und segi begeischteret

und jede wos ghöri segi begeischteret

und jede wos ghöri läbi 

es gebi Mane

die tögid

ires Läbe lang

Fraue deschtabilisiere

vor alem bi Hochschtahpler

und Künschtler segi dahs de Fall

e Frau segi schnäll deschtabilisiert

wänn si mit de Fanttasih

und de Wohrt- und Bildergwalt

vomene Künschtler konfronntiert wärdi

es gebi Wändige und Thehme

diä segid unändlich verfüererisch

en Dichter verhärrlichi nämmli

en Dichter hebi Fraue in Himel ueh

und wecki soh di gröhschte Erwartige

woner nattürli niä chönn erfüle

de Dichter segi ja sälber

nur en arme chliine

vo Bilder überschwämmte

modifizierte Schimpans

wo gärn mittem Führ schpili

aber sich immer schnäll devoh machi

wänns bränzelig wärdi

 

es hebi sehr schtarchi Schpannige gäh

oni das öppis passiärt segi

er glaubi si hebi öppis ininn

inäprojiziärt

es segi öppis

i ihrem Gfühlshushalt

durenand grahte

er hebi kei Ahnig wahs

tississhell

hebisi grüeft

tississhell

hütt heber wider

diä Frau gseh

bi dere imm immer

öppis inn Sinn chömm

er wüssi nüme gnau

woner dahs gläse heb

vilicht i de Schpalte

vonere Sexualberateri

er hebi emal gläse

vo eim bi demm

d Frau imm Bett ales

hebi welle beschtimme

bi demm d Frau

gseit hätt wener sich

hätt müese bewege

bi demm d Frau au

beschtimmt hätt

wäner hätt tärfe choh

er hätt erscht tärfe choh

wänn sih es hätt welle

und so lang si nid hätt welle

hätt er nid tärfe choh

er versezzi sich immer

wäner diä Frau gsech

i diä Lahg vo demm

wo nid tärf choh

wo sich veruckt mues

zämerihsse und veruckt

mues uhfpasse

dases imm nid chunnt

und demms schlächt gieng

wännsem chiem

er hebi hütt

diä Frau nid nur gseh

sondern au na

zimmli lang mittere gredt

und er hebi müese uhfpasse

daser derbi nid schtändig

glächlet heb