är segi mitt ire

e ziitlang immer

go schpazziere

und hebi

uf denä Schpaziergäng

immer en Schtänder gha

vom Aafang bis

zum Schluss

dahs hebi är ire

aber niä gseit

är hebi dahs

überhaupt niämärtäm gseit

wemm chönnti mer

dänn so öppis säge

es segid

schöhni Schpaziergäng gsi

de Aare entlang

iezz wonär altt segi

tänki är gärn

a diä Schpazziergäng zrugg

au wänn nüht wiiter

passiert segi

seltsamerwiis

segi nüht passiert

bi imm passieri

ebä nüht

är segi de Tüpp

wo de Schtänder

i de Hose bliibt

es segi möglich

soh zläbe

es läbid warrschinnli

na vili soh

mer mösi nur uhfpasse

dasmer nid z höchi Erwahrtige hebi

susch chönntimer nattürlli

scho inen gwüsse Schtress grahte

s meischte

wärdi nid gseit

är zum Bihschpihl

hebi Gedichtt wonär

niä chönnti publiziere

är hebi Gedichtt

wonär nidemal uhfschrihbi

ganz wichtigi Sache

chömid soh niä att öffentlichkeit

und dahs segi sicher

nidnu bi immsoh

dahs segi warrschinnli

aubi allne andere Mänsche so

es versteckid sich ali

ohni Uhsnahm versteckid si sich

ärtänki mängmahl

dasmer setti versueche

vodemm wäggzcho

ärtänki mängmahl

dasmer niä zu denä Veränderige chömi

vo dene mer immer träumi

solang mer so verloge segi

so bodelohs verloge

es segi ales ganz schwach

dahs segis Gheimniss vo alem

mer chöni dah nur schtuhne

wämmer dahs gsechi

mer chöni dahs fascht nid verstah

mer chönis nur verstah

wämmer ahnemm das ebä ales dah isch

wills so unglaublich schwach isch

di allgemeine Schwächi machis möglich

ali diä gschpängschtische Acktivitähte

es segi ales appsoluht gschpängschtisch

mer hebi s Gfühl das ales

augeblicklich chönnti verschwinde

das ales chönnti wägggwindet wärde

wägggwüscht es chönnti en Schwamm

drüberfahre es bruchti nid will

är hebi drumm immer echli Angscht

nid vill Angscht aber doch Angscht

är bringi die Angscht nid wägg

es hebi übrigens überahl uff de Wält

Gschpängschter si segid wältwiht verbreitet

und reisid au we veruckt im Zühg umenand

d Expärte nänid dahs Migrazziohn

us Tschihle chömids us Brasilie

us Auschtrahlie usem Iran us Egippte

us Gahna usem innerschte Affricka

us de Mongolei us Norwäge us Schwehde

essegi grausamm we alli diä Länder

abegwirtschaftet worde segid

ali die Länder exischtiärid fascht nüme

es gebi käsland wonid kaputtsegi

aber wunderbarerwiis

göngis immerwider wiiter

wunderbarerwiis nemiskäsänd

dahssegi innteressantt

dahswecki sis wüsseschafttliche Interässe

undmachi dasär sich bialldemm

garnizzo unwohlfühli

imene Wunder chönimersichja

nidunwohl fühle

es segi en Sumpf

und i demm Sumpf

versinki ales

so we früener im Norde

di alte Dähne

Sache inen Sumpf inegheit hebid

als Opfergahbe

Chleider Mässer Helme

und au Mänsche

mitt duregschnittene Häls

so flühgi au bi öis

ales inn Sumpf

und versinki

aber im Unterschiid zu früener

wo mängmal uffgrund

vo beschtimmte chemische Zämesezzige

ales bewahrt worde segi

wärdi bi öis nüht me bewahrt

es versinki ales

unwiderrueflich

es segi ales

scho versunke

bevors richtig dah segi

gwüssi Sache

flügid au sofort

diräckt inn Sumpf

chuhm dass si dah segid

mer segi nur dänn

würklich läbig

wänns anderi

guet mitt eim meinid

wänn anderi eim schezzid

und Fröid hebid

wänns eim gsechid

und gärn zuelosid

wämmer öppis verzelli

und fräged wes eim göngi

und eim sogahr

wettid fördere

iezz chöni mer sich

unggfähr vorsschtelle

wevill läbigi Mänsche

dases gebi

es gebi Mänsche

bi dene mer immer tänki

dass dahs grossi Liebendi

chönntid sih

es fähli ine nid vill

und dann währittses

är wünschti

är chönnti si ahleite

är wünschti

är hetti Ihfluss

uf diä tünne Bächli

wo dah flühssed

är wetti gliäbt wärde

wännär nume gliäbt wür

gliäbt als eine

mit demm mer rett

als eine womer glaubt

dasers wärt isch

dasmer mittem rett

als eine womer ales seit

är wetti eini sih

demm mer ales seit

är liidi drunder

dasmer imm niä öppis sägi

är liidi drunder

dases vili Mänsche gebi

wo niä oppis sägid

dahs segid ales schrecklichi Figuhre

si sägid nämmli nid nüht

wills nüht wellid säge

si sägid nüht

wills nüht chönid säge

und si chönid nüht säge

wills nüht im Chopf hebid

und si hebid nüht im Chopf

wills kei Liebendi segid

bi de Ameise

segi d Schtahtsform
genehtisch bedingt

es segi

so zimmli
jedes Wohrt
verdähchtig
zumindescht bi imm