bi imm chönis vohrchoh

daser plözzli sägi

de Pinotschett setti nid verfolggt wärde

bi imm chönis vohrchoh

daser säge es segi nid immer klahr

währ böhs segi und währ guet

es gebi Gueti wo ebeso böhs segid we di Böhse

es gebi Gueti wo vilicht na vill böhser segid als di Böhse

ähr segi ja immer bi de Guete gsih und segi na iezz bi de Guete

aber er hebi immer au druff glueget dases Böhsi gebi

und wänn di Böhse nid böhs gnueg gsih segid

dänn heber immer echli nahghulfe immer sehr gschickt

es hebis niämert gmärckt waserdah pohsget hebi

und soh segid vo de Guete na vili Böhse erzüght worde

na vili Monnschtrümmer di Guete hebid immer ganz unnschuldig tah debih

und hebid tah we wänn sih verfolggt und plahget würdid

aber innsgeheim hebid sih verfolggt und plahget

und uss ganz normahle fridliche Mänsche di gfürchigschte Tühfle gmacht

bi imm chönis vorchoh

daser plözzli soöppis sägi

daser plözzli sägi soh segi vilicht au de Pinotschett entschtande

soh vilicht de Hittler und de Bohrmann und de Himmler und de Stahlin

und au de Lehnin und au de Fidellggaschtro und de Düwalieh

und de Sohn vomm Düvalieh de Schangglohd Düwalieh

und de Mobutu und we si ali heissid

es gebi janasovili

d Wält segi ja voll vonene

es gebi ja meh Böhsi als Gueti

das heissi es gebi jagahrkei Gueti

es gebi ja nur Böhsi

und di Böhsischte vo allne

segidja di Guete

bi imm mösimer uhfpasse

bi imm chönis vohrchoh

daser sägi di Guete segid imm immer

 

navill unnheimlicher als di Böhse

iri Uhfgahb segi

es positihvs Bild z verbreite

iri Uhfgahb segi z säge

das ales beschtens laufi

iri Uhfgahb segi z märke

wasmerales nid tärfi säge

und dahs womer nid tärfi säge nid z säge

iri Uhfgahb segi z märke

dass s Schtänkere nüht nüzzi

sondern ales nurrna schlimmer machi

iri Uhfgahb segi dureblicke zlah

dasales höchscht ihdrücklichi Gschtalte segid

Phersöhnlichkeite Forrscher und Wüsseschaffter

iri Uhfgahb segi z säge

das höchscht interessanti Resultaht vohrliggid

iri Uhfgahb segi immer dahs z säge wo mösi gseit wärde

 

dahs segi iri Uhfgahb es gebi kei anderi 

 

Sitt einiger Ziiht

Hebi är immer schtärker

Dä Ihdruck

Das ali toht sind

Äs passiäri immer

Wänär mit anderä redi

Zmitzt imänä Sazz inä

Wärdi imm dahs klahr

Ja

Zwihfellohs

Das isch dä Tohd

es gebi immerna vili

wo nid begriffe hebid

was iri Uhfgahb segi

Si ghörtid

Eigettli ali

Is Gfängnis

Au mir ghörtid

Is Gfängnis

Laufed aber

Immer und ehwig

Ganz frölich

Und zfridä umä

Womerdänn z Tschiggahgo

Inn Schtau cho sind 

Pfrauä segid besser geignet

Für di modärni Arbeitswält

Si segid Meischterinä im Verdrängä

Si hebid sonä schtabihli Psüchä

Si märkid garnihd

Iwass fürä verchehrtä Wält

 

Si läbid  

eshebischo egwüssitrahgick

ärwürdi sogärn öppisanders mache

ärwürdi sogärn ganzanderscht läbe

ärwürdi gärnöppis schriibe

ärwüssti sogahr unggfährwahs

ärwüssti unggfähr Trichtigahzgäh

abermeh wüssiär ebä aunihd

ärchöni nasolangnahtänke

ärgsechis nid ärsegi

nidgeschiidgnueg dezue

aber aualiandere segidja

nidgschiidgnueg dezue

diandere schiinidimm

janavilltümmerzsih

si verzellidnämmli eifach

irgendöppis drufflohs

untschriibid vilibüecher

mit gschiidetittle

wodänn alichauffed

sibringid abernüht

sihälfid nüht

siverwirrid nurrnameh

mängmal schiinisimm

dasärs besser chönntimache

wännerechli

ennschärfere Verstanndhetti

echli esbessers Gedächnis

echli ebesseri Kombinazionsgahb

eswäri vilicht gahrnidsoschwirig

mermössti nurales echlianderschtgseh

es wunderi inn

wie extrehm läbesfindlich

das Africka segi

us dene Reiseprichte göngi hervor

das käne heb chöne umereise

oni daser beschtole

plünnderet oder au ummprahcht worde segi

au wäner praktisch nüht

uff sich treit hebi

so segi är errschlage oder errstoche worde

mer hebi dänn glaubt

är segi enn Zauberer

und scho en Hosechnopf us Mettall

segi sovill wärt

dasess sich lohni

inn ummzbringe

und wänn eganzi Expediziohn chömi

so sägezi demm en dummulafong

en richtige Glücksfall

iezz selli mer sich dahs vorstelle

was dahs für Tentwicklig

bedühtet hätt was dahs bedühtet hätt

dasmer sich uf dere Wält

niä hätt chöne bewege

ohni dasmer schwer bewaffnet gsi isch

und uf ales gschosse hätt

wo echli verdächtig gsi isch