sisindali

hundertmahl

weniger leischtigsfähig

als mihr gsi sind

und mir sind scho nidvill gsih

imm Vergliich mittä Vättärä  

wasseisch

zumm EffZehWeh 

ersegi a derä Bärdigung erschine

aber mitt verhülltem Haupt

sodaser di andere Truurgescht

nidheb müese gseh

woner über dBahnüberfüerig gfahre segi

heber ä Frau ghöre schtöhne

und dänn druff au na

ganzz churzz en Maa

es segi gsi wiä wänn zwei

irgendwo dune imm Gebüsch gläge währid

und Liäbi gmacht hettid

e chli mechanisch heber tänkt

ohni vill drumm und drah

er heb aber ahghalte

und abegluegt öb sich öppis bewegi

esschaja nidwiit ewäggsih

heber tänkt

aber sicher seger nid gsi

villicht segis doch wiitewägg gsi

villicht hebis da bi derä Ueberfuehrig

e chli e bsunderi Ackustick

mer hebi ja mindeschtens

en Kilometer wiit Gleis gseh

und villicht seg das Schtöhne

gar nid us derä Richtig choh

i diä är glueget hebi

das chömem jezzt inn Sinn

är hetti auna

idi anderi Richtig sellä luägä

jedäfalls heber na es Wiili glosst

aber es segi nüht me zghöre gsi

villicht segid diä zwei

une im Gebüsch ganz stilä gsi

will si inn gseh händ

wener da uff em Welo ghocket segi

 

und abeglueget hebi

es segi zum verzwiifle

daser soh segi

er währi liäber anders

vill zackiger

er würdi ganz gärn befellä

eifach befellä

und er wetti

dass dLüht mösstid umeränne

wäner öppis säge würdi

oder aunurrscho

 

sin chliine Fingär bewegä würdi    

 

öber ächt selli säge

daser nüt sägi

oder öber ächt au das

nid selli säge

daser öppis säge chönnti

wäner wetti

es mösids ja im übrige

alli uushalte

aber di einte chönids

liächter ushalte

als di andere

es gebi settig

diä chönid das ganz guet

uushalte

es gebi settig

diä bättid eifach

und dänn göngis ine wider besser

er tänki mängisch au

wänns imm ganz schlimm göngi

daser doch bätte chönnti

er chönntis doch probiäre

mer sölli nid lache

er hebi das tänkt

wänner chönnti bätte

dänn wärs villicht besser uuszhalte

er chönnti sicher na ganz guet bätte

er hebi als chind immer guet bättet

er hebi sogar eigeni Gebätt verfasst

und ines Büechli ine geschribe

aber bätte göngi nattürli nid

bätte das würdi är zallerletscht

da phacki mer am beschte doch grad zäme

aber was wüssi mer dänn eigettlich

mer wüssi nüht

und desshalb segi s bätte

villicht gar nid s tümmscht

e frau vo dere er

das nid unnbedingt erwartet hetti

hebi imm chürzzli gseit

si bätti mängmal

eifach so

nattürli nid zu Gott

aber zumene Baum

oder zumene Schtei

oder zunere Wullche

es segi fascht unnushaltbahr

aber mer chönni nüht mache

gar nüht

mer mösis uushalte

es göngi nid anders

mer chönni nüht mache

mer chönni nüht änndärä

es segi soh appsurd

mer mössti sich doch eigettli

drah gwönne chönne

aber mer chönni sich

nid drah gwönne

mer wärdi immer widder vo neuem

verlezzt und mer verbränni

immer widder von neuem vor Schmärz

es segi we inere Höll

 

es segi i demm Täggscht
lenggscht nid ales gseit
äs segi viles nur aahtühtet
und viles nidemal aahtühtet
äs segi viles total versteckt
oder äs wärdi s’Gägeteil
vo demm gseit
woner hebi wellä sägä
äs hebi also eigentlich känn Sinn
das zläse
är wetti eigentlich nid
dass das öpper läsi

är hebi öppis gschribä
wo niemert verstöchi
das segi äs guets Zeiche
wänn öppis vo niemeräm verstandä würdi
öppis wo verstandä wärdi
segi nüht wärrt gar nüht
är wetti das wonär geschribä hebi
am liäbschtä na übersezzä
und zwahr inä Sprach wo sältä segi
zum Biischpiil is Kroahtische
aber vilicht gebis dänn Kroahte
wo doch plötzlich öppis vo demm
wonär geschriibe hebi läse würdid
also mössti är warrschinnli
änanderi Sprach findä
är mössti e ganz
unnbekannti Sprach findä
irgendwo inn Polineehsiä
oder inn Affrika
oder imm Tibeeht