es segi

zum chozze

är chozzi

iezz dänn

öppsi nid

au märki

dases sone

chözzeligi

Stimmig seg

es segi

so richtig

chözzelig

dahs heber

früener gärn

gseit aber

s hebi nüht

gnüzzt es hebi

niämärt gchozzet

und är au nihd

es segi nüht

passiärt

es segid

imm Gägeteil

ali immer

frünttlich gsih

und soh reger

sich hütt

nüme so uhf

und beuhrteili

diä Zueschtänd

milder aber

zum chozze

wäris eigettli

gliich na

 

mer setti nid immer nur lache

und sich luschtig mache drüber

und ales ironisiäre es isch

nämmli öppis ärnschz öppis

üsserscht ärnschz es göngi

gwüssermasse um Sein oder Nichtsein

 

we ischsi ächt
uff diä Idee choh

 

es chönnti

ales ganz

anderscht sih

es segi ales

en Rihsezuefall

dases soh segi

dasär zum Bischpihl

dah segi i derä Funkziohn

under dene Läbesummschtänd

segi e unnghüri Folg vo unnghüre Zuefäll

är segi iezzt ebä i diä Umschtänd

inekwätscht worde und mösi sich

i denä Umschtänd zrächtfinde

und sich bewähre so we sich

anderi i de verücktischte andere Verhelltnis

mösid bewähre als Polahrforscher oder

Matrohs imene Underseeboot oder als

Bibliothekahr oder Jurnalischt

är chönnti viles sih

aber er seg froh daser das chön sih woner seg

er wüssi nihd öbers wühr uhshalte

wäner öppis anders wär

und was für de einzelne gältti

dahs gältti au für es Volk oder füres Land

au dah chönnti ales ganz anderscht sih

und mer mös froh sih dases soh seg wes isch

es chönnti na vill schlimmer sih

und es isch es Wunnder dases nid schlimmer isch

hütt hegis imm tröimt daser im Wilde Weschte verhaftet worde segi

mer hebi inn ufere tüppische Wildweschtbahnschtaziohn

inen tüppische Wildweschtgfängnisswage ine gsezzt

hebi aber nid appbschlosse sodaser wo de Zuhg langsam ahgfahre segi

echli usserhalb vo de Schtaziohn hebi chöne usegumppe

und sich grad hebi chöne imene Meisfäld verschtecke

mer hebi aber gliich öppis gmärkt

und Kawallerih uhsgschickt und inn ahgfange sueche

er hebi wenig Schansse gah wäggzchoh es hebi überahl

nur freis Fäld ghah aber dänn hebid inn Lüht gseh

vomene Zirkus wo grad ihtroffe segi und am Rand

vo demm Meisfäld ahgfange hebi sini Zält uhfschtelle

diä Lüht hebid na Hilfsarbeiter gsuecht

und hebid imm gwunke er seli choh

es segi en chinehsische Zirkuss gsih

und ali hebid wihti wihssi chinehsischi Gwänder ahghah

und au är hebi möse settigi chinehsischi Gwänder ahlegge

und si hebid inn sogahr echli gschminkkt

und soh segis völlig unnmöglich gsih inn z finde  

 

är hetti fascht glueget

är hebi wele luege

wass füre Fassigschrafft

vorhande segi

was füres Fassixvermöge

es chömi ja nur uf dahs ah

es segi ales nur e Frahg

vomm Woluhme je gröhsser

s Woluhme deschto besser

segis deschto höcheri

Läbesschanse segid vorhande 

Frau hebid im Sozzialismus
bessere Sex
heber gläse
hätter gseit
mer mössti das aber na gnauer undersueche
es hebi ja sehr verschideni Sozialisme gäh