ähr hebi känn Hindergrund ähr hebi nur luhter armi Tühfel als Vorfahre
wämer sini Vorfahre vo de letschte zähtuhsig Jahr würdi
ine Reie schtelle so wührimer ales halbverhungereti Chrampfer und
under ine au de eintte oder andere Schlaumeier und Glohn finde
Geischt wühri mer nid vill finde nur grad immer sovill we nöhtig isch
um nid underzgah aber Geischt wo öppis nöis machi öppis wo über
de täglich Läbeskampf unsegaht dahs gebis nihd währet Jahrtuusige nihd
es hebi niä öppis Höchers ggäh und drumm heber iezz au settig grohssi
Schwirigkeite sich zrächttzfinde i demm Konzärt woner segi är segi
nämmli imene Konzärt vilicht chönnti ähr Schtammvatter sih enahrt en
Noah Schtammvatter vomene nöie Gschlächt wodänn i drühtuusig Jahr
emahl so kompliziärti Musick würdi schrihbe und sone Simfonih würdi
zschtandbringe vo imm chöni na nüht choh er wetti nur mängmahl
das vo imm öppis chiemti er wetti au schöni Sache mache chönis aber
nihd er segi eifach nanig kulltiwiärt gnueg är chöni nur schtuhne
wäner iezz im Konzzärt segi und Gerrschwihn ghöri und Börnschtein
de Börnschtein hebi e simfonischi Jeremiachlahg gschribe mit für inn
ganz unnverschtändliche Ahchläng a uhralti Gsäng und litturgischi
Forrmle und mitt de Chlage vonen Vorfahr gschribe hebi si sind we
Blindi durd Schtrahsse taumlet hebi däh gschribe ine Schrifftrole ine
und de Börnschtein vertohnz drühtuhsig Jahr schpähter voll Bluet sinz
voll Bluet mer chas nid ahlange und sini Simfonih wird uhfgfüert
i allne Egge vo de Wält i Konzärttsähl mit Chrohnlüchter und allte
Dahme und Töcktere und Professohre denä diä Musick aber z luht isch
unz kompliziärt e pahr sind gahr nid choh und händ iren Schtuel la
lähr bliibe si hettid liäber öppis anders gha ine isches echli z luht
und z veruckt es ischja fascht we Tschähss voll Bluet hänz grüeft
wichedene uhs langez nid ah wänns nid so luht währ würded sicher
e pahr ihschlahfe aber es isch nattührli glihch es Kunschtwärck
de Börnschtein hätt öppis zschtandprahcht wonähr ehrlich gseit
überhauppt nid verstöchi är segi ganz eifach z tumm dezue we ja ali
andere au es gitt niämärt im Saal wos verstaht hebi ähr tänkt es gitt
sicher niämärt in demm Saal wos verschtaht es gseht käne uhs we
wäners würdi verschtah dahs segi imm en chliine Trohscht vilicht
verschtahz de Dirigänt vilicht verschtahz aber au de Dirigänt nihd
da hämmer öisi Zwiifel de Dirigänt isch vilicht eifach echli en
Gschäfftlimacher wo i de Wält umereist und überahl echli abrahme tuet
d Lüht wänd ja eifach i dene Konzärtsähl under dene Chrohnlühchter
öpper Berüämmpter gseh und drumm gitt settigi Berüämmpti wo für zwei
Tahg uff Bährn chömed und huschhusch mitte arme Musicker öppis
zsämechlöpfed aber irgendwoh uff de Wält gizz dänn aber doch öpper
wo diä Musick verschtaht dahs unheimliche und wunderbahre Zämeschpihl
vo so villne verschidäne Innschtrumänt Fagotte Konntrafagotte Tuhba
Posuhne Bassposuhne Trommpehte Piccolos änglischhornn si ali wärded
gschpill so luht dases gaht mer ghört nurrna ein grohsse Klang mer
ghört si nüme einzzeln mer gseht nurra Bewegige mer gseht wes blased
mer gseht we Pfinger uf de Seite vo de Tschellos tanzed mer gsehz
aber ghörz nihd aber öpper wirz verschtah tänktmer und gschihdi
Nottizze mache und en Uhfsazz schrihbe und nach zwänzzg Jahr wirtt
enandere däh Uhfsazz läse und verschtah und beihflusst wärde und
sälber en nöie Uhfsazz schrihbe oder e nöii Simfonih oder vilicht
wärdi däh au dahs wo gschribe worde segi krittisiärä und ablehne
uf e radikahli Ahrt und däh wärdi säge de Börnschtein hebi nid dahs
erreicht womer tänki daser errreicht hebi
däh wärdi säge dases
nid richtig komponiärt segi und nid schöhn töhni und chönnti besser
gmacht wärde däh wärdi säge es töhni villz grohssschtettisch und
öppis wo grohssschtettisch töhni chöni niä richtig schöhn töhne
sondern höchschtens für churzzi Momänt und de Börnschtein segi gahr
nid sonen Hochentwicklette wemer immer meini mer mösi na höcher choh
mer mösi vo dene Fähler wäggchoh und mösi probiäre na vill bessers
zmache und vili hüeschtled nattürli wärettem Konzärtt oder hueschted
und verbreited Grippevihre es wärded e pahr chrank wärde nach demm
Konzärtt öb ähr ächt au wideremahl e Gripp überchömi dahs hätter tänkt
währettem Kontscherto inn Eff ähr hebi scho ehwiglang kei Gripp me
ghah es chönnti sih daswäner iezz e Gripp überchiem dahs e zimmli
ährnschti Sach chönnti währde er segi iezz so altt das e Gripp
gfährli chönnti sih dahs heber tänkt wärettem de Zimohn Barto öppis
gschpillt hätt wonähr mitt simm Puureverschtand nid hebi chöne erfasse
är segi enn Puuhr und bliibi en Puuhr är glaubi nihd daser na sehr
enttwicklixfähig segi es segi nühtme zmache
iezz zum Bihschpihl
chöni ähr sich überhauppt nüme at Musick erinnere wänn de Zimon Barto
d Rappsodih in Bluh gschpillt hetti waser ghofft hebi dänn chönnter
sich na erinnere aber iezz erinneri ähr sich nurrna a diä vile Dahme
wo öppis hebid la gheie es segi di ganz Ziit immer öppis an Bode
gheit psunders wänns ganz fihrlich und ärnscht gsih segi dänn segi
es Brüleetwih oder e Brüle oder es Täschli oder en Schlüssel an Bode
gheit dahs hebi dänn immer ganz fanttastisch gschtöhrt und segi soh
lächerlich gsih dases eigettli für inn di ganz Kommponischtekunscht
widerleit hebi für inn segid eigettli Konzärtt öppis lächerlichs
voller Zwäng e Tortuhr mit Chleiderzwang Grawattezwang Dirigänttezwang
Schtillsitzzwang Klatschzwang aber dahs segi warrschinnli doch nid
di richtig Ihschtelig ähr setti diä bürgerliche Läbesforme schezze
öppis anders gebis ja nihd ähr setti lehre dadermit zläbe ähr setti
das au gnühsse de Tomass Mann oder de Nihtsche hebis au chöne gnühsse
