wännsi Gott wäri

würdi si allne Mänsche vergäh

und sofort ales Lihde beände  

er hebi wideremal

nid chöne schlahfe

und sich zwei schtund

hin und här gwälzzt

schliessli heber s Liecht ahzüntt

und welle öppis läse

nach sine Erfahrige

würki dahs mängmahl

aber wahs welli mer

au läse so am morgenam drüh

dah gebis nid vill

dah gebis eigettli nüht

womer würkli chöni läse

und soh heber zimmli verzwiiflet

eine vo de Göhtebänd

vomm Büechergschtell gnoh

oni vill Hoffnig

die Göthebänd tögid nämmli

s Unglück nur vertüüffe

ganz bsunders

die vo de Göhtespezzalischte

verfasste Nachwohrt regid inn uf

aber dasmahl hebis doch

zimmli guet gwürktt

er hebi de zweitte Band gnoh

däh mit de Gedicht usem Nachlass

und inn uufgschlage und gläse

dasmer sich mösi weehre

dasmer allem zum Trozz

sich erhaltte seli

allne zum Trozz

niä sich bucke

tue wenen Sahtann

dahs hälfi

chrefftig sich zeige

uuhfträtte

dahs würki

Gägestühr gäh

dahs hälfi

dahs rüefi

gueti Geischter

herbiih