waser ales nid hebi chöne dahs mösster emahl gnau undersueche

er göngi immer devoh uhs daser vill hebi chöne aber dahs segi

doch vilicht Ihbildig

singe heber zum Bischpihl nid chöne und scho gahr nid zweischtimmig

er hebi nid nu nid chöne singe er hebi au nid gärn gsunge und singi

na iezz nid gärn

es Musickinnschtumännt heber au nid chöne schpile im Gägesatz zu

gwüsse Kamerahde zum Wallter wo Gihge gschpilt hätt und zum Jürg

wo Klavier und erschtna

Kwährflöhte gschpillt hätt diä mitt de Innschtrumänt segid imm

immer als echli höcheri Mänsche vorchoh und segid au gschihder

gsih als di andere

hebid ganz mühelohs immer gueti Nohte ghah und hebid i de Mittagspause

güept i de Aula hänz tärfe s Klavier benuzze und er hebi tärfe zuelose

ganz wunderbahr segis gsih

ganz unnerchlährlich Tscheikoffski am liäbschte hetter aber

Tschähs gschpilt am liäbschte hetter es Tschähsinschtrumänt

glehrt Posuhne

oder Trompehte oder Bännscho weniger villicht Schlaggzühg und au nid

Klarinette Posuhne oder Bännscho dahs hetter wele schpile Posuhne we

de Pappa Buh mit sinere

Viking Jazz Band us Koppehage de Pappa Buh gebis übrigens immer na

er heben chürzzli gseh im Tivoli er hebi zimmli Müeh ghah und segi

immer nurr churzz

uff de Bühne gschtande en allte Mah aber vor vierzgg Jahr seger

jung gsih und chrefftig und hebi gwaltigi Posuhnesohli gschpilt

oder dänn Bänscho

schtill und zfride imm Hindergrund schtah und ales trähge dahs hetti

imm gfale deht hetter sich gseh und turne heber grad au nid chöne es

hebi doch a vilem gfählt

am Reck praktisch nüht nur echli hange und schwinge und loslah

kei Risefelge wes di andere händ chöne ohni dasmer gwüsst hätt

woses glehrt händ

au kän überschlahg und känn Handschtannd nidemahl en Handschtannd

heber chöne nur im Räne seger guet gsih dahs segi ebä eifach gsih

deht heber träniert

wenen Veruckte uff de Mittelschtrecke seger klahr de Bescht gsih

deht heber kei Gegner ghah ali diä Kwährflöhteschpiler undandere

Helde heber mängmahl

fascht überrundet und soh heber doch e Schtärki ghah und hebi

über dere Schtärki viles andere chöne liächter näh oder gradd

vergässe soh segis gsih