är wetti gärn wüsse

was de Kleischt

i sine lettschte vierzä Tahg

gmacht hätt

er hätt e Frau gsuecht gha

für en gmeinsame Freitohd

und diä Frau au gfunde

hütt würmer sicher au na eini finde

es würded sich sicher vili mälde

uf es Innseraht hi

bimm Kleischt hätt sich damahls

sofort eini gmäldet

und mittim na vierzä Tahg

imäne chliine Hottel gläppt

am Rand vo Berlihn am Wannseh

är segi we de Kleischt

immer wiit

vo allne wägg

mer wüssi sehr wenig

über de Kleischt

mängmahl fahri är Tramm

nur damit är wideremahl Mänsche gsech

aber dänn verschrecki är immer

aber wiler wüssi daser verschrecki

segis nid so schlimm är luegi au immer

wo di gfürchigschte Tüppe uhsstiigid

und är beruhigi sich wäner gesechi

das fascht niä eine deht uhsschtiigi

wonär uhsschtiige mösi

ahnezes ächt

jah si ahnez

aber undütli

si lönd sich

wägedemm nid

us irer Rueh

bringe nihdd

imgringschte

ahnezes ächt

jah si ahnez

aber si tönd

drumm na vil

tümmer sinnd

navebissener

unnahschprächbahr segiz ali zäme

er hebi sich zrugg zoge

isis Schloss wo usserhalb vo de Schtatt gläge-n-isch

und hebi niämärtme wele gseh

und mit niämärtäm wele rede

so heber uf sis ändi gwartet

wobih er feschter als je zuvohr

a sine Uhffassige feschtghalte hebi     

sih

wo glehrt hebid
ales
vonere andere Sihte hähr zgseh
gsechid
umwases gaht umwahs kämpft wärdi
und was de Kampf bedühti

Wasischeiggentlich

Mittä Frauä lohs

Hätter grüaft

Wasszummtüfel

Isch mittä Frauä lohs

Neinei

Ich hanes schöhns Läbä ghah

Dahs hätt mini Mueter au gseit

Wovor föif Jahre gschtorbenisch

Mer händ es schöhns Läbä

Mirrsind drühmal in Südamerikka gsih

Inn Tschihle und Bolifiä

Undau zweimahl inn Tibeht

Unddänn derapp

Unddänn deruhf

Auz Honduhrass

Auz Kammbotscha

Auz Patagoniä

Einezwänz Tahg

es gebi en Grahd vo Intelligänz

wo em Läbe hinderlich segi

wämmer sonen Grahd vo Intelligänz hebi

dänn mösi mer schpezielli Verfahre wähle

umm nid underzgah

dänn mösi mer sis Läbe

i de Uhsläufer vo de Intelligänzkurffe

lokalisiere deht wo Kurffe verflachi

deht wo si scho übergöng it Tummheit

ob mer wüssi

wenen Farbfärnseh funktionieri

wämer en Bildschirm

mittere starche Luppe aluegi

dänn chöni mer dahs gseh

di ganzi Flächi segi mit Fälder bsetzt

wo nur us drei Farbe bestöchid

es gebi ufem Bildschirm nur chlinschti Fälder

mit de drei Grundfarbe rot grüen und blau

das entsprächi de drei Arte

vo Zapfezälle wos i de Netzhuut gebi

und dur d Veränderig vo de Helligkeit

vo dene Fälder chönid

praktisch ali Farbe erzühgt wärde

bim Uhfträffe vom Elektrohneschtrahl

gebid si Liecht ab es mösid daher

eifach Elektrohnestrahle im richtige Rittmuss

uf die Elemänt träffe

wonus anorganische Verbindige bestöchid

eo mit Sältenärdmetalle dottiert segid

für de Erzügig vo Roht

diä bsunders schwirig segi

hebi sich neuschtens Europium

duregsetzt Europium

dotiert mit Ittriumoxydsulfid

är wunderi sich

wännär dahs läsi

wemer dahs hebi chöne erfinde

für inn wäri so öppis ganz ummöglich

är chönnti en Farbfärnseh niderfinde

es segi schaurig

we Sache plötzlich chönid

enanderi Färbig überchoh

es chöni öppis

wo ganz wunderbahr erschini

ufeimal ganz peinlich si

je wunderbarer öppis segi

deschto grösser segi Gfahr

dases sich verwandli

und wägrutschi

mer mösi wansinig ufpasse

mer mösi ufpasse wenen Häfftlimacher

wämer öppis Wunderbarem begegni

er hebi es Hämpp ahghah

wonär sälber niä hetti chöne ahlegge

mer hetti inn als überegschnappt ahgluegt

wänär mit somene Hämpp detthär choh wär

aber de Dilen hebi

das wansinige Hämpp ahgha

ganz voll mit grosse Pünkt segis gsih

blau mit grosse rohte Pünkt

es ganz verpunktets Hämpp

uf de Plattehülle gsechi mer dahs

und de Dilen hebi überhaupt

na en Huufe wansinigi Sache ahghah

Hüet Jaggä Hose Sunebrülä

s verücktischte Züüg

mer segi unsem Stuhne nid usechoh

au usem Stuhne über sich sälber

über di eigetti schwache Exischtänz

idere so wenig möglich gsih segi

us imm wäri sicher meh worde

wännär i somene Hämpp

hetti chöne umelaufe

i somene uverschämmpte Hämpp