es gitt nüht

wos nid gitt

nüht Böhses gebis i siner Erinnerig

aber ön dahs unbedingt es guez Zeiche segi

öbs nid glihch dah gsih segi s Böhse

eifach echli veschteckt für inn nid sichtbahr

aber für de Vatter sichtbar fürt Mueter sichtbar

si hebiz imm vilicht nid zeigt si hebiz zrugggschühcht

mit vill Kunscht und überwindig überwindig

segi übrigens es Wohrt gsih woner vill ghört hebi

es choschti si vill überwindig hätter mängmahl ghört

vo siner Mueter aber nid so rächt veschtande

wases isch wosi sovill überwindig choscht

 

 

 

öber ächt e Chindheit ghah hebi

er erinneri sihch a einiges

aber nid a vill schöhn segis

daser fascht nüht Schlächz

ide Erinnerig hebi nüht Böhses

au nüht Truhrix nur emahl

hebi de Vatter vezellt das eine

eme andere esone Ohrfihge ggäh hebi

daser ganz e rohti Bagge ghah heg

ufem Bou segi dahs gsih sin Vatter

hebi ufem Bou gschaffet

als Bouschrihner das segi i sihne Auge

immer vill gsih er hebi sin Vatter

bewunderet für diä Türe woner ihgsezzt hebi

für diä Chuchene und diä Feischter

aber für anderi segi dahs sicher

nid vill gsih aber si hebiz nid gseit

und soh hebers au nid gmärkt

 

 

es hebi imm

immer öppis gfählt

aber er hebis nid gmärkt

oder nid wele märke

es gebi jana vill Lüht

dene göngis glihch

es fähli ine vill

aber si märkiz nihd

es göngi eigettli allne soh

und jeweniger mers märki

deschto besser segis

ähr märkis mängmahl

doch rächt dühtli

es segi unnglaublich

und unnheimlich

wasimales fähli

tänker dänn

es fähli imm ales

er hebi nüht

s Schlimmscht wo passiert segi i all dene Jahr

das segi das de Täll gschtorbe segi de Hund

woner is Militähr hebi möse hebi de Hund nüht me ggässe

und hebi sich ganz veränderet und anderi pisse

mer hebi imm gschribe is Militähr dasmer de Hund

wonen Schäferhund gsih isch hebi möse verschühsse

und er hebi nachähr sälber zwei Tahg nühtme ggässe

däh Tohd segi schlimmer gsih als de Tohd vomm Vatter

und schlimmer als de Tohd vomm Brüeder oder de Tohd

vo de Chuchighilfihn wo bi de Befrejig zu de Panzzer

grännt segi und hebi wele ufen Panzer ufegumpe und debih

mit de Bei it Chette inechoh isch si segi sofort verblüetet

aber öb de Tohd vomm Schähfer würkkli s Schlimmscht gsih segi

dahs segi nid ganz klahr de Dichter hebis eifach soh gschribe

aber mer wüssi ja nihd öb dahs woner gschribe hebi würkkli

dahs segi woner tänkt hebi und öber dahs woner gschribe hebi

nid gschribe hebi umm z luege öb mir öppis märkid wämmers

nid markid dänn isches au glihch dänn simmer sowisoh

verlohre und wämmers märkid dänn segis richtig dasers soh

gschribe hebi aber wahs chönimer dann märke es segi nid eifach

öppis z märke mer chöni märke wasen Mänsch segi

de Mänsch segi ebä nid soh wesichs gwüssi Lüht

vohrstellid de Mänsch segi echli gfühllohs und

unnberächebahr schpeziell wäner imene chlihne Dorf

am Bodeseh läbi inere unngünschtige Ziht dänn chöni deht

au entschprächend Schlimms passiere dänn blüehid deht

nid nurrt Chriesiböim und wärdid deht nid nurr Chilelieder gsunge

und nid nurr komuniziert und gfirmt diä gliiche Männsche wo

Choleseck umeträgid und mittem Welo zu irrne Schätz fahred

diä chönid au en Schtuel wäggschtohsse uf demm en junge Pohl

schtaht mittem Chopf ider Schlinge und diä gliiche Männsche

chönid au i de letschte Chriextage na e Brugg schpränge grad wänn

drei jungi Franzohse drüberlaufid es segi ales dettärminiert

und es würdi ales wider gliich ablaufe wämer namahl chönnti

ahfange dahs segis was de Dichter weli säge aber er sägis

eigettli nihd er sägis so dases niämärt märki de Dichter fintt

dases besser segi wämer settigi Sache nid seit oder veschlüsslet