si händ gflüschteret
si händ usgseh wenes Liebespaar
s hätt usgseh
we wänn er ire sehr schönt Wort wür säge
so schöni Wort
dass sis garnid hätt chöne glaube
fascht we s Gretchen im Fauscht
si hätt de Chopf gschüttlet
will das doch gar nid cha mögli sih
so schön und so jung isch si nämmli nihd
das häzzi gnau gwüsst
si händ aber über de Böiler grett
und über s Uhfheizze vom Böiler
mitt Nachtschtrohm
mer mösen mit Nachtschtrohm uhfheize
dänn segis billiger
dänn chönimer echli Gäld schpare

 

es gebi kei vereinzelti Sünd

jede Mänsch wo sündigi

sündigi au allne andere gägenüber

und jede Mänsch segi au

a de Sünde vo allne andere gschuld

und au Liäbi chöni e Sünd sih

es segi

wene Vergifftig

wene grohssi allgemeini

Vergifftig

es segi glaub
en Fählalarm gsih

er segi völlig abhängig vo ire
we vonere Droge

es gebi Sache diä segid eifach so dah

und erschreckid inn und gebid imm Rähzel uhf

und es schiini we wänn nur är elei nid wüssti

werum si dah segid ali andere schiinid z wüsse

werum si dah segid si luegid diä Sache ah

und sägid käs Wohrt es schiini we wänn sis

richtig findid dassi dah segid für inn aber segis

en Schreck är chönis nid verschtah är regi sich uhf

är findis furchpahr und am Furchpahrschte segis

dases niämärt furchpahr fintt es läbid ali we

Tohti inere Grueb under Tohte aber es schtöhri

niämärt es göngi allne sowiiht ganz guet

 

Requiem æternam dona eis, Domine,
et lux perpetua luceat eis.
Te decet hymnus Deus, in Sion,
et tibi reddetur votum in Ierusalem.
Exaudi orationem meam;
ad te omnis caro veniet.
Requiem æternam dona eis, Domine,
et lux perpetua luceat eis.

 

mer chöni

dah lehre

wemer nid

läbe seli

er wahrti

er mösi wahrte

bis Gschideri chömid

di Gschidere wärdid

dänn verschtah

was iezz lohs segi

di Gschidere

wärdid dänn

de Chopf schüttle

und d Händ verrüere

und alldäh Mischt

furttschühsse wo sich

dah ahgsammlet hebi

warrschinnli chönimers nidemahl

zu Schtuhdiezwäcke bruhche

es segi Schrott

es segi Lähri

 

es segi unnglaublich we wiiht hütt falschi Bewusstsih

verbreitet segid es gebi Lüht diä haltid mittere under

andere Ummschtänd höchscht bewundernswärte Harttnäckigkeit

a falsche Vohrschtelige fescht wohär chunz dahs mösstimer

sich frähge wie hätt diä Verirrig chöne entschtah es segi

warrschinnli naniä sovill Falsches i de Chöpf ine gsih sovill

Verchehrz und Verdräiz aber dahs entschprächi warrschinnli em

gschichtliche Verlauf imm iezzige Schtahdiumm mösid d Chöpf genau

mit dene Vohrschtellige erfüllt sih und mösid diä Sischtehm wot Vohrschtellige erzühged

genau soh schaffe we iezz und zwahr uf

Hohchtuhre suscht chömis nid guet susch gebis nur en Chrieg

d Alternatihve segi enn Chrieg öb öppe öpper en Chrieg weli  

wisoh är glaubi dases

früener besser gsih seg

chöner ja au nid säge

vilicht segis früener

ja gar nid besser gsih

sondern ebesoh verlotteret

nur segi d Verlotterig

meh oder weniger gschickt versteckt worde

so guet chönis ja früener gar nid gsi sih

dänn früener seg ja di hüttig Verlotterig

vohrbereitet worde mer chönnti eigettli

allne denä wo iezz jammered und sogahr Büecher

schrihbed übert Verlotterig vohrwärffe

das ebä grad sih nid immschtand gsih segid

öppis gäge d Verlotterig z undernäh si hettid

doch echli schtränger chöne sih echli muetiger

si hettid sich echli weniger chöna uf iri Indiahnerschpiili

ihlah aber wesauimmer seg es schihni en unuhfhalzame

Prozäss zsih öppis wo sich

immer widderholtt es seg we

wänns en Schwamm gähpti

wo immer wider übert Wantafle

fahri und ales uhslöschi

aber Wantafle gebis ja nüme

es gebi Prockischrihber

und Pauerpoinnt es segi also

we wänns en Strohmuhsfall

gähpti oder en Haardiskerrer 

vo Ziit zu Ziit

heber amis wider

es Buechprojäkkt

settigi Projäkkt

segid vo underschidlicher Chrafft

mängi segid nid sehr läbesfähig

anderi tögid inn wuchelang

oder monatelang beschäfftige

versandid aber schliessli dänn gliich

es versandi immer ales

wenigschtens iezz versandi immer ales

er hebi s Gfühl dass sini Projäkkt

nüme di gliich Schtärchi hebid

we früener sis gröhscht Projäkkt

heber als Zähjährige ghah

und soffort mit vill Schwung duregfüert

er hebi en Kriminahlromahn gschribe

e Gschicht vo e paar Buebe

wo vo Gangschter entfüehrt worde segid

und imene Auto dur ganz Amerika duhr

gfahre sind und schliessli na ufe Insle

prahcht worde sind vor de Küschte vo Ekwadohr

vo Amerika heber e Charte ghah mit allne Schtett

und allne Schtahte diä hebid so fanttastischi Näme

Arizohna zum Bihschpihl und är segi äxtrah

it Schtattbibliothehk go Büecher hole

um diä Insle besser z beschriibe d Pflanzewält

heber doch möse käne d Tierwält heber möse beschriibe

und au Küschte und d Bärge es hebi en Romahn ggäh

vo genau hundert Sihte bi imm mösis immer rund uhfgah