si hebi hütt vill ztue
si mösi d Erinnerig uhslösche
si mösi iri Seel na verschteiere
si mösi vo nöiem ahfange zläbe

er segi en Uverschammte

er hebi wider uverschammt vill

für siich usegschöpft

iezz hebis für di andere

nüme gnueg er seli nid

so uverschammt sih

er tärfi iezz eifach nüme

sälber useschöpfe

er mösi warte

bis de Vatti useschöpfi

vo iezzt ah

schöpfi nur na de Vatti use

wär so uverschammt isch

däh chamer nüme lah useschöpfe

wämer inä mösst es Dänkmal sezze
so mösstis so uhsgseh
wes Voortrekkerdänkmahl
zPretoria
so monumentahl
so unheimlich
so schauderhaft
es mössti us Granitt sih
ales us Granit,
au ali Figuhre
Geischt mössti nid zeigt wärde
defür vill schtille Wahn
vill schtilli Grausamkeit
und Nidertracht
und e irreparabli Verschteinerig

Mer mönd iezz
widder wägg
mer mönd iezz
widder go höpperle

är göngi efeng gar nümme gärn

ine Buechhandlig

früener segi e Buechhandlig en Ort gsi

womer gschiidi Gsichter gseh hebi

und är segi mängmahl nur

ine Buechhandlig ggange

umm wiedermal interessantti Gsichter z gseh

aber hütt gebis meh Geischt

inere Mezzgerey oder inere

Pabetterih oder Parfümerih

hütt mössti är ine Parfümerih gah

umm Schpuhre vo demm z finde

wönnär früener inere Buechhandlig

gfunde hebi diä Buechhandlige

segid wiä Heiligtümmer gsih

deht segi längscht nid jede ine

nur Gebildetti nur Schtudänte

nur ahgehendi Schriftschteller

diä hebid sich dort es Goldmanntaschebuech

kaufft en Roman vom Doschtoieffski

oder vom Dümass Die drei Musketiere

oder si hebid sich deht

e Filmziitschrifft abghollt

si hebid deht jede Monät iri

Filmziitschrifft abgholt

und segid meischtens so fascht vegange

wännsi nur s Tittelbild gseh hebid

deht segi nämmli d Kattrin Denöhv

oder de Vittorio Gassmann druff gsih

glaub doch nid ale Mischt