es segi guet
dases Jutuub gebi

und deht

de Kefn Kinni

wo dis taun singi  

 

es segi guet
dass diä iezz ali gschtorbe segid

so möser kei Angscht me hah

dass si sich chönid a inn erinnere

und vo imm verzele 

 

iezz
wärdisdänn
widderchüeler     

o was isch us öi worde
wo sinder iezz

läbeder na
sinder chrank

verrunzlet und verblüet

warteder scholang nüme ide Gäng

händer käs Zimmer me

tänkeder nüme a öis                

 

er mösi under anderi Lüht choh,
under Normahli

vilicht gebis diä irgendwo

verschteckt inere appglägne Gegend

vilicht im Bolivieh oder Thüringe

sicher nid ide Schwiiz

öb im ächt öpper en Tipp gäh chönnti

odder wänns nid anderscht gaht

dänn gönger zu de Obdachlose

zu de Alkoholiker und Gschtörte

zu de richtig Gschtörte

und wägg vo dene wo glaubid

uf de Höchi z sih

vilicht mösster uf Kolumbie

detthi wo däh gläppt hätt mitt sine zweituusignünhundertachtedachzg Afforisme

odder it Wüeschti vo Arizona

odder uf Florida

wo si sich einmal i de Wuche träffed

verusse

im OZOI Parking Lott

alti Lüht

wo alti Liäder schpiled

und schön derzu singed

Bluugrass

ganz wunderbar

und e paar wenigi Lüht sitzes uff Gämpingschtüel

wosi mittgnoh händ und zuelosed

ganz zfride und ruig

mittem Läbe hänzz appgeschlosse

au mit Amerika

aber Bluugrass losiz na gärn

Bluugrass

segi vilicht di schönscht Musik

wos gebi